Елена Рыбакина - «Indian Wells - 2023» жарысының жеңімпазы

Еліміздің бірінші ракеткасы Елена Рыбакина Индиан Уэллс турнирінің жеңімпазы атанды

Финалда отандасымыз Беларусь өкілі Арина Соболенконы 2 сағат 6 минутқа созылған ойында 7:6 (13:11), 6:4 есебімен жеңіп, спорттық мансабында тұңғыш рет Masters турнирінде жеңіске жетті.

Ойын барысында Рыбакина жеті эйс жасап, екі қос қателік жасады. Он брейк пойнттың үшеуін пайдаланды. Арина болса, 4 эйс, 10 қос қателік және алты брейк пойнттың екеуін пайдаланды.

Айта кетейік, қос теннисші осыған дейін «Australian Open» жарысының финалында кездесіп, Арина 4:6, 6:3, 6:4 есебімен жеңіп, өзінің спорттық мансабындағы алғашқы «Grand Slam» жарысын ұтты. 

Елена осы жеңістен кейін 1000 рейтингтік ұпай жинап, WTA рейтингінде 7-ші орынға көтерілді. Дәл қазір еншісінде 3720 ұпай бар. Сонымен қатар, 1,2 млн АҚШ доллары көлемінде табыс тапты. Соболенко болса, 650 рейтингтік ұпаймен бірге, 662 мың АҚШ долларын алады.

Енді әлемнің жетінші ракеткасы ретінде Елена Майамидегі (Флорида штаты, АҚШ) «Miami Open» турнирінде бақ сынайды.