Криштиану Роналду Португалиямен үшінші рет чемпион атанды
Португалия ұлттық құрамасының шабуылшысы Криштиану Роналду ұлттық құрама сапындағы үшінші ірі турнирде топ жарды. Ұлттар лигасының финалында Роналду бастаған жігіттер Испанияны пенальти сериясында (негізгі уақыт — 2:2, пенальти — 5:3) жеңіп, турнир жеңімпазы атанды. Роналду сол ойында бір голмен көзге түсті.
Бұл турнирде Португалия құрамасы Роналдудың қатысуымен екінші рет жеңіске жетіп отыр. Бұған дейін команда 2019 жылы Ұлттар лигасының алғашқы маусымында, өз алаңында өткен финалда Нидерландыны 1:0 есебімен ұтып, чемпион атанған еді.
Ал, 2016 жылы Криштиану Роналду Еуропа чемпионатында Португалия құрамасымен бірге тарихи жеңіске қол жеткізген.
Сонымен қатар, бұған дейін 40 жастағы Роналду Ұлттар лигасы тарихындағы финалға шыққан ең егде жастағы ойыншы атанған еді.
