«Қазақстан» телерадиокорпорациясы UEFA EURO 2020 көрсетілімін қорытындылады
11 маусым – 11 шілде аралығында «Qazaqstan» және «Qazsport» телеарналары Еуропаның 11 қаласынан 100 сағаттан астам уақыт тікелей трансляция жасады. Турнир аясындағы 51 матчтың 32-і Ұлттық арна эфирінен, 28 матч «Qazsport» телеарнасынан көрсетілді. Плей-офф кезеңіндегі ойындар екі арнадан қатар берілді. Әр ойынның алдында тікелей эфирдегі студиялық «Доп дода», «Путь на Уэмбли» бағдарламалары жарыққа шықты. Бұл спорт жанкүйерлері үшін ойын алдындағы болжамдарын, матч туралы ойларын бөлісетін алаңға айналды. Бағдарламаларға 50-ден астам футбол мамандары, бапкерлер, ойыншылар, жанкүйерлер мен функционерлер қатысты. Матчтарды жүргізуге Корпорация еліміздегі ең үздік 15 комментаторды шақырды.
Еуропа чемпионаты аясында «Qazaqstan» және «Qazsport» телеарналарының әлеуметтік желілерінде «Матч есебін тап», «Енді сенің кезегің» байқаулары ұйымдастырылды. Еліміздің әр түкпірінен 21 жеңімпаз анықталып, EURO 2020 турнирінің ресми добы мен командалардың жейдесі табысталды.
Бір ай уақыт аралығында «Qazaqstan» және «Qazsport» арналарының рейтингтік үлесі 316 пайызға, ресми сайттарды тұрақты пайдаланушылар саны 244 пайызға артты. Әлеуметтік желілерімізге 65 мыңнан астам жаңа пайдаланушы қосылды.
«Қазақстан» телерадиокорпорациясы барша көрермендерге, студиялық бағдарламалардың ерекше өтуіне атсалысқан жүргізушілер мен спорт сарапшыларына, қазақстандық жанкүйерлерге футбол тойының ерекше атмосферасын сезіндірген комментаторларға алғыс білдіреді.
Төртжылдықтың келесі басты бәсекесінде кездескенше!
