Ерасыл Сәулебеков жасөспірімдер арасында Әлем Чемпионы атанды
Мексика мемлекетінде ауыр атлетикадан жасөспірімдер арасындағы Әлем Чемпионатында қазақстандық Ерасыл Сәулебеков 67 келі салмақ дәрежесінде топ жарып, жарыс жеңімпазы атанды.
Қос жаттығу қорытындысында спортшы 281(123+158) келіні бағындырды. Жарыстың күміс жүлдесі түріа спортшысы Саин Алааддинге 278 (121+157) бұйырса, Польша елінің өкілі Бартош Бурский 269 (116+153) қола жүлдегер атанды.
Сонымен қатар Мексика жерінде Қазақстан құрамасының қоржыны тағы екі алтын жүлдемен толықты. 17 жасар Едіге Емберді 73 келі салмақта қос жаттығу қорытындысы бойынша 306 (134+172) келіні бағындырып, Әлем Чемпионы атанды. Едіге әлем рекорды жаңартқанын айта кетейік.
81 келіде сынға түскен Денис Полубояринов Әлем Чемпионы атанды. Денис қоржынымызға үшінші алтынды салды. Денис қос жаттығуда 323 (143+180) келіні бағындырды.
